نظرة و ابتسامه !!

 حاجات كتير أوي كنت فاهماها على  إنها صح بس اكتشفت انها غلط وحرام

ابسط مثال الارتباط اللى كل الناس شايفة إنه عادي و إن إيه المشكلة  ده مجرد اتنين بيحبوا بعض و هيطولوا فترة قربهم من بعض على ما يتخطبوا ,, يعني هما بيعملوا إيه غلط يعني .!! ده مجرد كلام ف التليفونات ليل  نهار { عشان يتطمنوا علي بعض بس مش أكتر } على كام كلمة بحبك و وحشتيني { لزوم المشاعر يعني } و لمسة إيد عشان يفهم اللي حواليهم إنها تخصه { المدام قريباً يعني } و كام نظرة و تسبيلة وقت اللزوم و خلاص .. إيه الغلط و الحرام ف كدة  

أنا بقى مؤخراً عرفت إن كل الكلام ده غلط و مش كدة بس لأ ده حتى المخطوبين ميحقلهمش ب كدة , مجرد الخلوة ببعضهم حرام ..  ما بالكم بالكلام و النظر و اللمس و شوية  الزيادات اللي في ناس شايفاهم عادي ؟؟ بس لو عندكم الجرأة إنكوا تعرفوا فين الغلط عشان تمتنعوا عنه و فين الصح عشان تعملوه اسألوا شيوخ و دوروا و اسألوا ناس موثوق ف كلامهم عشان تتأكدوا ,, لأني مش هينفع افتي ف احكام تخص الدين بس كل ال حبيت اعمله  إني اوصل الكلام ال عرفته 

حبيبي .. وحشتني أوي

" - حبيبي .. وحشتني أوي 

  - مش هشوفك ؟ وحشتني عنيك و ابتسامتك

  - وحشني التوهان فـ نظرتك ليا

  - وحشني احساس الأمان بـ لمسة إيديك

  - من زمان مخرجناش سوى

  - ............... "

كتير أوي بيقول الكلام ده و بيتقاله الكلام ده ، و كتير أوي شايفين الكلام ده عادي

هو فعلاً عادي { بس فـ حالة واحدة بس } و هي بين الزوج و الزوجة

حتى المخطوبين ملهمش حق حتى إنهم يبصوا لبعض نظرة حب او نظرة اشتياق

تفاصيل صغيرة

لما تكون متبعاك من بعيد عشان بس تطمن عليك ، و لما قلبها يدق زي الضرب على 

الطبول أول ما تلمح صورتك ، و لما تركز و تفتكرلك كل كلمة قولتها لها حتى و لو 

كانت تافهة بالنسبة لك ، و لما تتعامل معاك غير ما بتتعامل مع كل الناس بس فـ  

نفس الوقت على طبيعتها معاك ، و لما تضايق إنك بتكلم غيرها أو تحس إنك بتعاملها 

زي ما بتعامل غيرها ، و لما تفرح بوجودك حتى لو مجرد سكوت ، و لما بتكلمها 

عشان تطمن عليها بتطير لـ سابع سما 

، و لما تحس إنك ناسيها أو مبقاش فارق معاك وجودها من عدمه بتنزل لـ سابع 

أرض

ده كله مش بيمثلك حاجة ؟

قلب بيلعب بالنار

احساسي بيك زي احساس طفل بيلعب بالنار و مبهور بشكلها

أنا مش خايفة من النار نفسها أنا بس خايفة لتحرقني

و هنا أنا بكون تحت رحمة جزئين مني

الجزء اﻷول و هو الجزء العاقل و بيأمرني أبعد عنك

و الجزء التاني و هو الجزء المتهور اللي بيشجعني إني أقربلك

و يفضل الإستفهام هنا مبهم .. هو أنا هبعد ولا هقع تحت تأثير الجزء المتهور و أقرب

 و النار تحرقني ؟

ما بين التمنتاشر و العشرين

كبرت .. أنا كبرت ، امبارح كنت تمنتاشر و انهاردة ماشية في

 

العشرين ، قابلت ناس و فارقت غيرهم ناس تانين ، عشقت

 

قلوب و كرهت ناس من كتر الذنوب

شَقّيت طُرق و مشيت دروب ، عرفت غدر و قابلت وفا ، صارحت ناس لحظة صف،

 اتعلمت معنى القسوة و جربت لون الجفا ، عاشرت ناس بتوع مصلحة ، و شفت 

ناس غاويين انزحة 

حلمت .. أيوة حلمت حلمت ببكرة جايلي أبيض ، مريت بأيام مخططة بأسود ، حلمت أفرح حلمت أسعد ، حلمت أطير و جناحي أفرد .. حلمت أطوف ببيت رب كريم و

 حلمت إنه يرضى عني أصله غفور و رحيم 

شفت حقايق شفت نفاق ، شفت كدب خيانة و زيف ، عرفت ناس الغدر عندها كيف و البجاحة مذاج ، الحقد ليهم أكسجين و الوطينة مية ، و النفسنة عندهم مالهاش علاج

وسط الحزن رسمت بسمة ، في عز فرحي نزلت دمعة ، وعيت و عقلي كبر ، بكيت و قلبي صبر ، اتعلمت امتي افارق و امتى اسامح و مين اعاتب ، مريت كتير بلحظات ندم و لحظات عرفتني معنى الالم

مش هقول عمري ما فـ يوم كدبت ، ولا هقول عمري ما أذيت حد ، بعترف إني ياما

 غلطت و يمكن أوقات أكون نافقت ، و جايز برضه ابتسمت كام ضحكة خايبة احاسيسها الحقيقية عن قلبي كانت غايبة

أرجع و أقول أنا هي أنا و هتفضل كدة مهما حاولت بس الاختلاف إني كبرت ، وعي

 و عقلت ، و فهمت كتير حاجات و بيها سلمت